睇下個日期

時間轉眼即逝，好快又一日。好多時身邊的事物，不知不覺會提醒你，一日有時真係好易過。

某天，細老闆唔知做乜就走執檯。要知道，細老闆張檯永遠埋滿文件和雜物，情況更蔓延到隔離的同事張檯，所以他走去執檯可以話係奇事一樁。點知執執下，他突然遞了一份文件俾我，叫我簽完交還。我一睇，原來係人事部的通知書，話我知我仲有幾多日大假，幾時要清晒假，但封通知書的發出日期為2月29日；換句話說，他遲了1個多月先俾我。

細老闆解釋話我3月初去了出差，所以唔記得，但就算計我出完差返港至今，都有半個月啦！他還催我快D簽，我睇唔過眼一句窒埋去：「一陣先啦！我而家簽完俾番你，你又係唔知放去邊。」

怎知好戲在後頭，他執執下又拎住張單俾我，話應該係我。我瞄一瞄，抬頭個名的確係我，個張原來係公司幫我供MPF的收據。但我睇到個日期之後，當堂呆一呆，因為張單係公司幫我供03年6月的MPF，即係接近5年前。

我心諗，究竟我細老闆張檯有幾耐無執過，點解有人可以忍受到自己張檯亂成咁……

但原來有口話人無口話自己，早幾日係屋企搵張廢紙用，手痕痕調轉張紙望下，原來係我大學year 2某份功課的draft，究竟係幾多年前就唔好講，只係諗起，覺得自己原來儲埋儲埋咁多垃圾，如果係錢又幾好呀！

我有一個壞習慣，就是儲埋儲埋唔捨得使，前排過年執拾，就搵到2張戲院coupon，係06年聖誕公司party抽中，一心諗住睇D貴價戲時用。點知放係度唔記得用，到搵得番時，先發現要係07年之內用，否則當過期，咁就無端端變成了2張廢紙。

諗諗下，原來回復了所謂單身的日子，話咁快就3年……時間過得真係快……